Pontevedra será, un ano máis,
unha vila de conto.

Os días 7, 8, 9 e 10 de xuño de 2018 celebramos “Sete Falares” o Encontro Internacional de Contadores de Historias que, como cada primavera, volve para encher de narración oral a cidade.

Agasallarannos coas súas historias contadores e narradoras de Camerún, Portugal, Zamora e Galiza. Serán catro intensos días coa oralidade e a forza da palabra como absolutas protagonistas.

Nos Sete Falares teremos dúos de narradores, rutas de historias e sesións de contos en espazos singulares da cidade de Pontevedra. O Centro de Interpretación das Torres Arcebispais (CITA), o Palco da Música na Alameda, o Teatro Principal, as Ruínas de San Domingos ou a Praza da Peregrina, serán algúns deles.

O encontro promete ser toda unha festa da narración oral. Está orientado principalmente a público adulto, aínda que tamén teremos sesións dirixidas a público familiar. Toda a programación é de balde, a excepción da gala de clausura.

Se gustas de escoitar boas historias agardámoste nunha nova festa da narración oral. Vén aos Sete Falares!