Naceu en Los Silos (Tenerife). Estudou Filoloxía Hispánica e Filoloxía Francesa. É profesor da Universidade de La Laguna, e impartiu clases no mestrado de literatura infantil da UCLM e mais na UNAM de México. A súa vida artística xirou arredor do teatro, a narración oral e a escritura. Creou e dirixe na actualidade o Festival Internacional del Cuento de Los Silos e a revista Mne-mosyne dedicada á narración oral e ao conto.
Obtivo recoñecementos e premios como Ateneo de La Laguna, Premio á investigación teatral en Monastir (Tunisia), Premio Pajarita de Papel (Arxentina), Premio de Teatro Santa Cruz de La Palma ou o recoñecemento ao seu labor en educación e literatura en Quito (Ecuador) co Premio Noûs á excelencia educativa. Publicou na Arxentina libros como Princesa y pirata (2020) ou 15 de brujas (2000); no Brasil Contos africanos (2012) e en Colombia e México a novela Hicham, mar sin memoria (2016). En España publicou libros infantís como Quijote (2015), Lazarillo (2019), El príncipe durmiente (2017), El rey que bordaba estrellas (2020), Soy un dinosaurio (2020), Cuentos africanos (2013), El niño que no sabía jugar al fútbol(2016), Escritos en la corteza (2013) ou La tinta oscura (2018). Entre os seus libros para adultos podemos atopar Tres relatos fugaces de pasión (2001), Cosas de dioses (1999), Madreselva (2018), Lazos de humo(2018) ou Garajado (2021).
Desde 1984 a dedicación ao teatro fíxolle traballar como actor, dramaturgo ou director autores e textos como Ubú Rey de Jarry, Antígona de Jean Cocteau, Las galas del difunto de Valle-Inclán, Doña Rosita la soltera de Federico García Lorca ou versións de textos narrativos de Naguib Mahfuz, García Márquez, ou textos de creación persoal, como La vidriera, Kid Manodura, El requerimiento, Espíritus inicuos ou El viaje de las maravillas. Cómpre destacar as adaptacións de textos de teatro clásico do Século de Ouro, como Los guanches de Tenerife e La dama boba de Lope de Vega, La ropavejera de Francisco de Quevedo, La librería de Tomás de Iriarte, Los putos de Jerónimo de Cáncer, El amor médico de Molière, Las gracias mohosas de Feliciana Enríquez de Guzmán, ou Los habladores e El juez de los divorcios de Miguel de Cervantes. Funda a súa propia compañía teatral en 2003 coa estrea de Tenorios, versión propia do mito español baseada en textos de Tirso de Molina, Arcipreste de Hita e José Zorrilla. Traballou en Conciertos didácticos con Benito Cabrera, o Cuarteto Capriccio e con artistas como Fabiola Socas, José Manuel Ramos ou Javier Cansado (Madrid, Duólogos, 2018-19). Participou en festivais en América, Europa e África. En España destacan as súas actuacións no Festival de Almería, Almagro, Getafe ou Música en Segura (Jaén). Realizou programas de radio e televisión sobre lectura e literatura en emisoras locais de Canarias e de Madrid e na actualidade leva a sección “Cuentos y leyendas” do programa Noche de Taifas da televisión autonómica canaria.
