Narradora oral e educadora con titulación en Integración Social e Educación Infantil, Vero Rilo leva participado nun feixe de proxectos fóra e dentro do país e do Estado, deseñando e impartindo obradoiros para docentes onde fai convivir as dúas disciplinas que ocupan a súa vida: a narración e a práctica educativa.
No 2013 emprende Daboapipa, co acordeonista Santi Prieto, un proxecto conxunto de narración e música para público familiar que se deu a coñecer na escena galega con Contos de Animalario. Pouco despois chega ao público adulto con Historias de vida, guerra, amor e case morte, ao que lle dará continuidade Lavandeiras.
Actualmente, centra o seu traballo en Rilo&Penadique, xunto a acordeonista Sonsoles Penadique. Divas de diván, Pallasos en rebeldía ou Apatacón con Faia Díaz, vocalista de De Vacas, son outras das compañías nas que continúa traballando.